झोकदार जॅकेट

थंडीचा माहोल आणखीच कूल बनवण्यासाठी अनेक वेगवेगळ्या प्रकारची जॅकेट्स मार्केटमध्ये आली आहेत. स्वेटशर्ट , पुलओव्हर आणि स्वेटर्स यापेक्षा वेगळी , अशी ही जॅकेट्स बाइक राइड , जंगल ट्रेल किंवा ट्रेकिंगसाठी सोयीची असलेली ही ऊबदार जॅकेट वापरुन पाहायलाच हवीत.

दिवाळीनंतर हळूहळू थंडी जशजशी वाढते आहे , तसंतसं बाजारात थंडीपासून बचाव करणाऱ्या कपड्यांची रांगही वाढतेय. मुलांच्या वॉर्डरोबमध्ये सध्या पुलओव्हर , ऊबदार जर्किन , स्वेटशर्ट , स्वेटर यांचा भरणा होत असेल.

चकचकीत , तरीही ऊबदार

नायलॉन , शिफॉन असं चकाकणारं कापड आणि आतल्या बाजूने फर किंवा लोकरीचा ऊबदारपणा देणारी जॅकेट्स सध्या बाजारात आली आहेत. आकर्षकतेच्या दृष्टीनं त्याचा चकाकता पॅटर्न तर उत्तम आहेच , त्याशिवाय थंडीत ट्रेकिंगला जाताना किंवा बाइक राइड करतानाही वापरण्यासाठी ही सोईची आहेत. लेदर , जीन्स ही उत्तम फॅशन स्टेटमेंट मिळवून देणारी कापडं असली , तरी सध्या बाजारात आलेल्या लोकरीच्या आणि होजिअरीच्या जॅकेट्सनाही चांगलीच मागणी आहे.

रंगीन जॅकेट्स

काळा , चॉकलेटी आणि गडद तपकिरी हे रंग जॅकेटसाठीचे म्हणून अगदी फिट बसणारे असले , तरी अलीकडे या रंगांव्यतिरिक्तही काही रंग बाजारात आले आहेत. पांढऱ्या किंवा फिक्या रंगाच्या टी-शर्टवर उठून दिसणारा गडद हिरवा किंवा नेव्ही ब्लू रंग , गडद काळ्या किंवा तपकिरी रंगावर शोभून दिसेल असा क्रीम कलर. असं रंगांचं वैविध्यही जॅकेटमध्ये उपलब्ध आहे. लाल-पांढरा , पांढरा-निळा , काळा-पांढरा , पिवळा-निळा , ब्राउन-क्रीम कलर ही रंगांची काही ठराविक कॉम्बिनेशन्स बाह्या आणि गळ्यापाशी असलेली जॅकेट्सही उपलब्ध आहेत.

खादी स्पेशल

ऊबदार जॅकेट्सच्या वैविध्यात अजूनही खादी जॅकेट्सचा मान काही वेगळाच आहे. प्रत्येकाच्या वॉर्डरोबमध्ये असायलाच हवं असं हे खादीच्या कुर्त्यावर झक्कास खुलणारं खादीचं जॅकेट फॅशन लिस्टमध्ये वरच्या स्थानावर आहे. कूल आणि ट्रेंडी लूकबरोबर मनापासून जपावासा वाटणारा पारंपरिक लूक देणारं खादीचं जॅकेट! वापरायला सोपं , सुटसुटीत आणि भरमसाठ किमतीचं नसलेलं असं असल्यामुळे त्याला मिळणारी पसंती आजही टिकून आहे.

पॅटर्न ? तुम्ही म्हणाल तो...

गोल , चौकोनी किंवा ' व्ही ' आकाराच्या गळ्याची , हाताला नाडी , कमरेच्या दोन्ही बाजूंना नाड्या किंवा बटणं , हूड आणि चेन असलेली , बिनबाह्यांची , तर काही पूर्ण लांबीच्या हातांची. अशी विविध पॅटर्नची जॅकेट्स सध्या बाजारात दाखल झाली आहेत. ४०० ते तीन हजार रुपयांपर्यंत या जॅकेट्सच्या पॅटर्नप्रमाणे बदलत्या किमती आहेत. थंडीव्यतिरिक्तही जंगल ट्रेल्सच्या दरम्यानही जीपमधून फिरताना या जॅकेट्सचा उपयोग करता येईल , इतकी ती सोईची आहेत. त्याच त्याच पॅटर्नच्या स्वेटशर्ट किंवा पुलोव्हरपेक्षा काही वेगळं खरेदी करण्याच्या प्रयत्नात असाल , तर यावर्षीच्या थंडीत हा ऊबदार जॅकेट्सचा पर्याय निश्चितच चांगला आहे.

आर्मी स्टाइल

सध्या जॅकेटमध्ये सगळ्याच जास्त बोलबाला आहे , आर्मी स्टाइल स्वेटर्स आणि जॅकेट्सचा. ' जब तक है जान ' मधल्या किंग खानच्या आर्मी लुकमुळे तरुणाई आणि मार्केट भलतेच प्रभावित झालेले आहेत. त्यामुळे आर्मी लुकच्या जॅकेट्स , टोप्यांनी बाजारात धुमाकूळ घातलाय. या आर्मी जॅकेटवर कार्टून्स , इंग्लंड , अमेरिका तसंच ऑस्ट्रेलिया अशा देशांच्या झेंड्यांचे फोटो दिसतायत. काही जॅकेट्सवर तर या झेंड्यांच्या फोटोंचं मस्तपैकी कोलाजही केलेलं दिसून येतंय.
आपल्या आर्मी ड्रेसवरुन प्रेरणा घेऊन केलेले हिरवे कोट्स आणि यूएस आर्मीसारखे करड्या आणि हिरव्याचं मिक्सींग असलेल्या रंगाचे कोट्स फुल्ल फॉर्मात आहेत. आर्मी प्रिंट असलेली ही जॅकेट्स पूर्ण बाह्या आणि स्लिव्हलेस अशा दोन्ही प्रकारांमध्ये मिळतायत. कोणत्याही रंगाच्या कपड्यांवर शोभून दिसणाऱ्या आणि काहीसा गंभीर तरीही कूल लूक मिळवून देणाऱ्या या जॅकेट्सना मागणी आहे. बजेटनुसार साधारण ४०० रुपयांपासून ते १५०० रुपयांपर्यंत ती उपलब्ध आहेत. शिवाय मागे जोडलेल्या टोपी अथवा हूड मुळे ती अधिक ट्रेंडी वाटतात.