दागिन्यांची आवड ब्राँझयुगापासून!

दागिने हा महिलांचा वीक पॉइंट. पण दागिन्यांबाबतची ही आवड काही अलिकडच्या काळात निर्माण झालेली नाही. तर पार ब्राँझयुगापासून महिला दागिन्यांच्या बाबतीत ' हळव्या ' असल्याचं अलिकडेच जर्मनीमध्ये झालेल्या एका संशोधनात स्पष्ट झालं आहे. जर्मनीच्या पूर्व भागात रोशलिट्झजवळ नव्या रेल्वेमार्गासाठी खोदकाम सुरू असताना इसपू १५५० ते १२५० या कालखंडातील एका महिलेचा सांगाडा अलिकडेच अभ्यासकांना सापडला. या महिलेला ब्राँझच्या लहान वळ्या असलेल्या हेडबँडसह दफन करण्यात आले होते , असे शास्त्रज्ञांना आढळले. हॅले येथील म्युझियममध्ये आता हा सांगाडा ठेवण्यात आला आहे. अशा प्रकारच्या वळ्या याआधीही स्वतंत्रपणे आढळून आल्या होत्या. मात्र या नव्या संशोधनामुळे त्यांचा आभूषण म्हणून कशा पद्धतीने वापर केला जात होता , हे समोर आले आहे , असे या म्युझियमच्या प्रवक्त्याने सांगितले.

अंजली जोसेफ यांचा सन्मान
आशियातील सर्वात मानाच्या समजल्या जाणाऱ्या ' मॅन एशियन लिटररी प्राइझ ' साठी नामांकित झालेल्या १५ लेखकांमध्ये भारतीय लेखिका अंजली जोसेफ यांच्या ' अनदर कंट्री ' या कादंबरीचा समावेश झाला आहे. लंडन , पॅरिस आणि मुंबई या तीन शहरांच्या पार्श्वभूमीवर विशीतल्या एका तरुणीच्या आयुष्याचे चित्रण करणाऱ्या ' अनदर कंट्री ' ला आशियातील नऊ देशांमधील १०८ पुस्तकांमधून त्यांना शेवटच्या १५मध्ये , म्हणजेच ' लाँगलिस्ट ' मध्ये स्थान मिळाले आहे. या पुरस्कारासाठी शॉर्टलिस्ट झालेल्या लेखकांची यादी ९ जानेवारीला घोषित होणार असून अंतिम पुरस्कार १४ मार्चला हाँगकाँग येथे होणाऱ्या सोहळ्यात जाहीर केला जाणार आहे. अंजली जोसेफ यांची ही दुसरी कादंबरी. अंजली यांच्या ' सरस्वती पार्क ' या पहिल्या कादंबरीलाही अनेक पुरस्कार मिळाले होते. आता ' मॅन एशियन लिटररी प्राइझ ' चे नामांकन मिळाल्याने त्यांच्या शिरपेचात आणखी एक मानाचा तुरा खोवला गेला आहे.